Actif yn trefnu Hanner Marathon Dyffryn Tywi cyntaf erioed

Ar ddydd Sul, Awst 16, croesawodd Tîm Cymunedau Actif Cyngor Sir Gaerfyrddin redwyr o bob cwr o Dde Cymru i Hanner Marathon Llwybr Dyffryn Tywi cyntaf erioed a werthodd allan.

P'un a oedd y cyfranogwyr yn edrych am amser gorau personol, yn hyfforddi ar gyfer marathon llawn neu'n ymgymryd â'u hanner marathon cyntaf, cynlluniwyd y digwyddiad i groesawu rhedwyr o bob gallu.

Gan ddechrau a gorffen yn Ysgol Bro Dinefwr yn Ffairfach, cymerodd y rhedwyr lwybr syfrdanol 13.1 milltir, heb draffig ar hyd Llwybr Dyffryn Tywi newydd. Gan droi o gwmpas ar hanner ffordd yn Llanarthne, teithion nhw trwy rai o dirweddau harddaf Sir Gaerfyrddin.

Cafodd y rhedwyr eu cefnogi gan dorf uchel a oedd yn cynnwys ffrindiau, teulu, a gwylwyr lleol o amgylch y cwrs.

Yr athletwr gwrywaidd cyntaf i groesi'r llinell derfyn, a leolir y tu allan i'r ysgol uwchradd, oedd Daniel Griffiths mewn amser o 1 awr, 9 munud a 17 eiliad.

Gan gwblhau'r cwrs mewn amser o 1 awr, 27 munud a 40 eiliad, y rhedwraig leol Tifanie Lewis oedd yr athletwraig gyntaf i gwblhau'r cwrs.

Daeth Michael Roderick (1:12:51) a Thomas Jones (1:17:22) yn ail a thrydydd yn ras y dynion. Sioned Howells (1:28:58) a Lydia Morgan (1:29:21) oedd yn ail ac yn drydydd yng nghategori'r menywod.

Hoffai'r tîm trefnu ddiolch i'r holl bartneriaid a gwirfoddolwyr a chwaraeodd ran hanfodol yn y digwyddiad. Roeddent yn cynnwys marsialiaid cwrs, timau gorsafoedd dŵr a chymorth cyntaf i 'pacers', darparwyr tylino a lluniaeth a swyddogion Athletau Cymru.

Mae canlyniadau'r digwydd ar gael yma